أربــــع خناجــــــــــر

أربع خناجـــر

https://www.youtube.com/watch?v=gti5ahJpO_0

مشكلة لا جات حاجتك بيدين البخيل .... مايفكك لين تدفع كثر مايدفعه
ومشكلة لا صرت مطعون بكفوف الدخيل .... في ظهرك اربع خناجر وبالصدر اربعة
ومشكلة لا ضاق بالوقت رجال ثقيل .... يطلب احبابه وعيا زمانه ينفعه
ليت ربي مايحاسب خليل من خليل .... دام ماللحظ فزعة وللوجه اقنعة
ودام ما للعذل تالي وما بالحيل حيل .... الغلا سم نذوقة ومر نجرعه
نحتري فيه اللقا والحصيل هو الحصيل .... مثل حلم ماتحقق وعييت اقطعه
كني اللي حط بشفاه من جمر المليل .... لا قدر يرميه للناس وازرى يبلعه
والظروف اللي حدتني لنيران وفتيل ....عرضت دمع المحاجر لشي يجزعه
والمدامع بالغلا لا تحال ولا تحيل .... والمشاكل كل ما جـات جات مجمعه
إعذلوني عن هوى النفس وعيونــي تخيل .... في حبيب ما تركته ولازلت اتبعـــــه
مغرم في حب مثله ولا ارضى له بديـــــل .... عيني تشوفه وقلبي يجوع ويشبعــــه
ذاك كل مـازان بالي وطـالعت النخيــل .... ماذكرت الآ ثباته بوقت الزعزعـــة
ما هو الآ قطعة من حشا فلب عليل .... وماني إلا قطعة منه مخلوق معه
لا جميل شفت قبله ولا بعده جميل .... العذارى رهن رمشه وانا رهن اصبعه
والله انه لو طلبني طلوع المستحيل .... لطلعه (منيه .. مناك) يعني لطلعه
ما علي من الملامة ولا هرج الهبيل .... ما اشجع الرجال لا ثار غيرة ، ما اشجعه
في عيون اللي عشقني ولا جاني هزيل .... الله اللي حط عشقه بقلبي وازرعه
لو سكت ينطق له الصم والدنيا تسيل .... وان حكى كن اكثر المزن يوقف يسمعه
سلسبيل من شفاته يخالط سلسبيل .... معمعة بسكات ، واحلى سكات بمعمة
ما هقيت ان أكثر الليل يمرح بالجديل .... لين شفته شوف عيني بكفه يرفعه
وان حييت وما بقالي معه ياكود ليل .... لاسهره باول غروبه واموت بمطعه
والله ان العشق ( جمرة وطاحت بالشليل ) .... وان حصل ( ما طاعك الوقت بأحبابك طعه )
ومنهو اللي علم اعداي نكران الجميل ؟ .... ومنهو اللي خان خلي وحاول يقنعه ؟
كل عاذل ردني عنك يالطرف الكحيل .... ياعسى الله يقلعه .. ياعسى الله يقلعه
يامعرض قلب الاحباب للدرب الطويـــــل .... ( السعة لا بارك الله بالضيق ) السعة
والله ان الوقت قاسي وانا ماني ذليـــــل .... واشهد ان الرجل مرات ظنه يخدعــــه
وانتم تعذلون خفاق بعيون العديل .... ما رحمتـم نار جرحه وغيرة مدمعـــه
والسوالف ليلها ليل والحايل يحيل .... والمشاكل مشكلة مشكلة متجمعة
مشكلة لا خانـــك الوقت بالحمل الثقيــل .... لو زرعت الزرع هوج العواصف يشلعه
ومشكلة لا صار عاذلك ما يبرد غليـــل .... لاترده طيب كلمة ولاحد يمنعــه
ومشكلة لا صرت مطعون بكفوف الدخيــل .... في ظهرك ابع خناجر وبالصــدر اربعـــة

كلمات / حــامد زيـــــد